Мета: Напорите на Република Српска за создавање паралелни институции ја загрозуваат стабилноста во регионот

Претседателот на Албанија Илир Мета изрази загриженост поради, како што наведе, засилените напори на Република Српска да се повлече од државните институции и да создаде паралелни институции на армијата, судовите и даночниот систем во БиХ.

Мета на својот Фејсбук профил оцени дека со поткопувањето на Дејтонскиот договор е загрозена регионалната стабилност и животите на граѓаните од сите националности.

Тој додаде дека ваквите потези „сериозно му штетат на владеењето на правото и на перспективите за европска интеграција на државите и на регионот”.

„Иницијативата на пратениците на Собранието на Република Српска да почнат да работат на создавање на овие институции и изготвување нов Устав е спротивна на 26-годишните напори на босанските граѓани, локалните лидери и меѓународната заедница за зајакнување на мирот и безбедноста во БиХ”, напиша Мета.

Тој ги повикува на ангажман во дијалогот политичарите на Република Српска и на Федерацијата Босна и Херцеговина за решавање на нивните спорови во меѓусебна доверба, со цел да се унапредат неопходните реформи за подобрување на животот на граѓаните, унапредување на државните интегративни процеси, што би послужило и за зајакнување на мирот и безбедноста на целиот Западен Балкан.