Ловџиите од Кичевско се пофалија со богата ловна сезона

Како никогаш досега ловџиите од трите ловечки друштва од Кичево, секој викенд со пребогат плен се враќаат дома.

Нема ловечка дружина која во секој викенд нема да отстрела барем две-три диви свињи, а некои имаат отстрелано и двојно повеќе. Ловџиите пребогатиот лов на дива свиња го лоцираат во енормниот пораст на овие животни во природата и нивно се поголемо присуство во близина на селските населби.

– Енормниот пораст на диви свињи во природата, придонесе оваа есен да имаме пребогат лов во сите делови од нашата општина. Сите ловечки дружини се враќаат дома со богат плен и според сите показатели оваа ќе биде рекордна година, вели Даме Петрески, ловџија од Кичевско.

Покрај зголемениот број на диви свињи во природата, тој причината за богатиот лов ја гледа и во сезоната на парење, кога дивите свињи се во интензивна дружба и континуирано движење.

– Втора важна причина за богатиот отстрел на диви свињи се должи и на сезоната на парење кога доминантните мажјаци не ги оставаат женките да спијат по два до три дена и се во континуирано движење, а чопорите ги следат послабите мажјаци. Токму нивното движење ги доближува до нас ловџиите, што се рефлектира и со уште побогат лов, истакнува тој.

Петрески оценува дека дополнително во кичевскиот регион голем придонес имал и снегот поради кој лесно можеле да се забележат траги од дивите животни.