Иран: Преговорите за нуклеарниот договор се движат во добра насока

Иран денеска соопшти дека преговорите за спасување на нуклеарниот договор од 2015 година со светските сили се движат во добра насока, а договор е можен доколку другите страни покажат добра волја и сериозност.

– Преговорите во Виена се движат во добра насока. Ние веруваме дека ако другите страни ја продолжат рундата преговори со добра волја, можно е постигнување добар договор за сите страни, изјави пред новинарите иранскиот министер за надворешни работи Хосеин Амир-Абдолахиан.

Тој нагласи дека „доколку другите страни покажат сериозност, покрај добрите намери, можно е наскоро да се постигне договор“.

Иран и САД вчера ги продолжија индиректните разговори, а фокусот на Техеран се однесува на укинување на сите американски санкции што ќе му гарантираат слободен извоз на неговата нафта.