На Бадник панихида за 144 обезглавени Поречани во месноста Дервишка нива

За прв пат годинава во месноста Дервишка нива во близина на превојот Барбарас ќе биде отслужена Панихида во помен на 144 обезглавени Поречани, настан што се случил на 6 јануари(Бадник) 1916 година, а ќе биде откриена и спомен плоча со имињата на настраданите.

По долго истражување професорот Зоран Тренески, заедно со својата екипа потврди дека на 6 јануари 1916 година се случил масакр кога се обезглавени 144 угледни Поречани, свештеници, учители и побогати жители од овој регион, масакр изведен од тогашните окупаторски бугарски власти.

– Иако досега се оперираше од бројка од 106 обезглавени Поречани кај Дервишка нива, со голема сигурност е потврдено дека тука се обезглавени 144 жители од овој регион. Во спомен на настраданите на местото викано Дервишка нива каде пред 106 години се случил масакрот, на 6 јануари следната година, ќе биде отслужена панихида и во нивна чест ќе биде откриена спомен плоча со имињата на сите Поречани кои настрадале на тој ден, истакна Бојан Бежоски, член на екипата што го изврши ова истражување.