Албанија за изгубени судски процеси пред арбитражните судови ќе плати над 338 милиони евра

Повеќе од 338 милиони евра, без пресметана камата, е сметката што Албанија треба да ја плати за петте изгубени предмети пред арбитражните судови.

Во извештајот на Високиот државен совет, КЛШ, по извршената ревизија, во државната адвокатура се наведува дека со значителна буџетска тежина е случајот со „Банкерс Петролиум“ вреден 221 милиони евра.

Друг судски случај е оној со италијанскиот бизнисмен, Франческо Бекети, со над 108 милиони евра.

КЛШ сугерира дека во сите овие случаи државната адвокатура, која ја претставува земјата во арбитражните судови, треба да користи најефикасни правни средства за да гарантира поцелосна и поквалитетна заштита на интересите на Албанија.

Проблем откриен во ревизијата на КЛШ е поврзан со недостигот на информации за износите платени во изгубените судења или оние што ќе бидат извршени од државниот буџет.