Директорот на ИЕА ја обвини Русија за влошената криза со гасот во Европа

Извршниот директор на Меѓународната агенција за енергетика (ИЕА) Фатих Бирол денеска ја обвини Русија за влошената криза со гасот во Европа, велејќи дека високите цени и ниските резерви на тој енергент главно произлегуваат од однесувањето на рускиот државен гигант „Газпром“. – РУСИЈА БИ МОЖЕЛА ДА ИСПРАТИ ЕДНА ТРЕТИНА ПОВЕЌЕ ГАС ВО ЕВРОПА ПРЕКУ ПОСТОЕЧКИТЕ ГАСОВОДИ, ИЗЈАВИ БИРОЛ, ИЗВРШЕН ДИРЕКТОР НА 30-ЧЛЕНАТА ОРГАНИЗАЦИЈА СО СЕДИШТЕ ВО ПАРИЗ.

Тоа количество гас би сочинувало околу десет отсто од дневната потрошувачка на Европа, што според официјални лица е потребно за да се избегне поголем недостиг во случај на постудено време од очекуваното.

– ШТО СЕ ОДНЕСУВА ДО ЕВРОПСКИОТ ГАС, ВЕРУВАМЕ ДЕКА ОДНЕСУВАЊЕТО НА РУСИЈА СИЛНО ПРИДОНЕСЕ ЗА НЕДОВОЛНИ КОЛИЧЕСТВА НА ЕВРОПСКИТЕ ПАЗАРИ. ЗА РАЗЛИКА ОД ДРУГИ ДРЖАВИ, КАКО НОРВЕШКА, АЛЖИР И АЗЕРБЕЈЏАН, КОИ ЈА ЗГОЛЕМУВААТ ИСПОРАКАТА НА ГАС ВО ЕВРОПА, „ГАЗПРОМ“ ГО НАМАЛИ СВОЈОТ ИЗВОЗ ВО ЕВРОПА ВО ЧЕТВРТИОТ КВАРТАЛ ОД 2021 ЗА 25 ОТСТО, ВО СПОРЕДБА СО ИСТИОТ ПЕРИОД ВО 2020 ГОДИНА, И ПОКРАЈ ВИСОКИТЕ ПАЗАРНИ ЦЕНИ, ИСТАКНА БИРОЛ ПРЕД НОВИНАРИТЕ.

Рускиот претседател Владимир Путин тврди дека „Газпром“ ги исполнил своите обврски од долгорочните договори, а за високите цени на гасот ја обвинува европската определба за нестабилните краткорочни пазарни цени. Путин изјави и дека германските купувачи на гас препродаваат руски гас во Полска и Украина наместо да ги задоволат потребите на сопствениот пазар.

Бирол не сакаше директно да каже дека Русија го користи гасот како средство за политички притисок врз Западна Европа.

Москва бара и од регулаторните тела на Германија и Европската унија да го одобрат новоизградениот гасовод Северен тек 2, преку кој природниот гас треба да пристигнува директно од Русија во Германија, на што најмногу се спротивставуваат Украина и Полска.