Дендиас разговарал со Нуланд за ситуацијата во Украина

Пред учеството на денешниот вонреден Совет за надворешни прашања на ЕУ, шефот на грчката дипломатија Никос Дендиас, за ситуацијата во Украина телефонски разговарал со заменичката – државен секретар на САД Викторија Нуланд, а остварил и низа средби со странски амбасадори во Грција, јави дописничката на МИА од Атина.

Како што напиша Дендиас на Твитер, сабајлево свикал и втор состанок на специјалната единица за управување со кризи во Министерството за надворешни работи за помош на грчките граѓани и иселениците во Украина.

Состанок за ситуацијата во Украина утрово одржа и комисијата за управување со кризи во Министерството за миграција и азил на Грција каде што биле разгледани сценаријата при евентуални бегалски бранови од Украина, а станало збор и за обезбедување хуманитарна и техничка помош за земјите кои веќе примиле бегалци.