Песков: Руските воени дејствија ќе запрат веднаш доколку Украина исполни определени услови

Русија сака Украина да ги прекине непријателствата, да направи измени во нејзиниот устав со кои ќе се гарантира нејзината неутралност и да се признае полуостровот Крим како руска територија, како и да се признаат Доњецк и Луганск како независни територии. Ова денеска за Ројтерс го изјави портпаролот на Кремљ, Дмитриј Песков.

Песков кажа дека Русија ја информирала Украина за нејзината подготвеност да ги прекине непријателствата „веднаш“, доколку Киев ги исполни овие барања.

Засега ова е најјасната дефиниција на условите на Москва за прекин на таканаречената „специјална воена операција“, која трае веќе дванаесет дена, забележува британската агенција.

Песков додаде дека Украина е запознаена со руските услови.

-Им беше кажано дека сето ова може веднаш да престане, рече тој.

Во врска со неутралноста на Украина, Песков рече дека Украинците „мора да направат промени во Уставот” за да им биде јасно дека нема да бараат да се приклучат кон ниту еден блок. Тој нагласи дека Русија во иднина нема да има никакви територијални претензии кон Украина.

-Ние навистина завршуваме со демилитаризацијата на Украина. Ставаме крај на тоа. Најважно е Украина да ги прекине непријателствата. Тие мора да престанат со непријателствата и тогаш никој нема да пука, рече Песков.

Изнесувањето на барањата на Русија доаѓа во време кога руската и украинската делегација во секој момент треба да се сретнат на третата рунда разговори за завршување на војната.