Кабинскиот екипаж на авиокомпанијата „Рајанер“ ги продолжи штрајковите во Шпанија за пет месеци

Кабинскиот екипаж на нискобуџетната авиокомпанија Рајанер, кој во Шпанија штрајкува за подобри работни услови од крајот на јуни, го продолжи протестот за уште пет месеци.

Шпанските синдикати УСО (USO) и Ситцпла (Sitcpla) денеска соопштија дека ќе штрајкуваат секоја недела од понеделник до четврток од 8 август до 7 јануари 2023 година.

Штрајкот од четири дена во неделата беше воведен бидејќи ирската авиокомпанија не го почитува шпанскиот закон и одбива да преговара, соопштија тие.

Екипажот бара почитување на „основните работнички права“ како што се 22 работни дена годишен одмор, 14 законски државни празници, имплементација на Законот за здравје и безбедност при работа и зголемување на платите на нивоата пред пандемијата.