Кина ќе ги „преземе сите потребни контрамерки“ во случај на дополнителни американски санкции

Кина денеска изрази противење на најновата закана на американскиот претседател Доналд Трамп за воведување дополнителни царини на кинески увоз поради „смртоносните текови на дрога“ во САД, обвинувајќи ја Белата куќа за „префрлање на вината“ и чекори кон дестабилизирање на глобалните синџири на снабдување.

Трамп вчера објави дека неговите предложени царини од 25 отсто за стоки од Мексико и Канада ќе стапат на сила на 4 март, со дополнителни 10 отсто царини за кинескиот увоз, поради континуираниот проток на смртоносна дрога во САД од овие земји.

Тој рече дека новите царини за кинескиот увоз ќе бидат дополнување на претходно воведената царина од 10 отсто од 4 февруари, што резултира со вкупна царина од 20 отсто за кинески стоки.

Во објава на неговата платформа Truth Social, тој изјави дека смртоносниот опиоид фентанил продолжува да влегува во САД на „многу високи и неприфатливи нивоа“.

Најавите за новите царини во Кина се совпаѓаат со почетокот на годишната парламентарна седница на Кина во среда, значаен политички настан на кој се очекува Пекинг да ги претстави своите главни економски приоритети за годината.

„Постојано изјавуваме дека едностраните царини ги прекршуваат правилата на Светската трговска организација и го поткопуваат мултилатералниот трговски систем“, соопшти кинеското Министерство за трговија.

Оттаму, исто така, истакнаа дека Кина има една од најстрогите и најтемелните политики за борба против дрогата во светот.

„САД сега повторно се закануваат со дополнителни царини. Ова однесување не е ништо повеќе од префрлање на вината и избегнување одговорност“, оцени кинеското Министерство за трговија.

Британските медиуми пренесуваат дека најавата на Трамп му остава на Пекинг помалку од една недела за објавување контрамерки, бидејќи администрацијата на новиот американски претседател го зацврстува својот став кон својот стратешки ривал, и покрај тоа што ја напушти заканата од царини од 60 отсто кога Трамп ја презеде функцијата.

„Кина ги повикува САД да не ги повторуваат своите грешки и што е можно поскоро да се вратат на правилниот пат на решавање на споровите преку дијалог на еднакви. Доколку САД инсистираат на овој начин на дејствување, Кина ќе ги преземе сите неопходни контрамерки за да ги заштити своите легитимни права и интереси“, соопшти кинеското Министерство за трговија.