Предност за Кил и ПСЖ пред реваншите

Екипите на Кил и на ПСЖ остварија победи на вечерва одиграните четвртфинални дуели од ракометната Лига на шампионите.

Кил пред своите навивачи ја совлада Барселона со 28:26. Германскиот тим имаше водство во текот на целиот натпревар, а најефикасен на дуелот беше Марко Вујин од Кил со 10 голови. Кирил Лазаров (Барселона) дуелот го заврши со два гола.

Францускиот шампион ПСЖ оствари победа од 30:27 на гостувањето кај ПИК Сегед. Најефикасни со по седум голови беа Михаел Хансен и Никола Карабатиќ.

На вчера одиграните дуели Вардар го победи Флензбург на гости со 26:24, а Веспрем беше подобар од Монпеље со 26:23. Реванш дуелите од четвртфиналето се играат од четврток до недела:

Вардар – Флензбург (27.април – четврток);

Барселона – Кил и ПСЖ – ПИК Сегед (29.април – сабота)

Монпеље – Веспрем (30.април – недела).