Пред спомен-бистата на воениот пилот, капетан Игор Ѓорески-Хектор во Гевгелија денеска беше положено цвеќе. Тој трагично загина пред 11 години во хеликоптерската несреќа на враќање од мировната мисија „Алтеа“ во Босна и Херцеговина.

Во делчевското село Ѕвегор течат последните подготовки за василичарскиот обичај „Сурова”. Според организаторите на карневалот, веќе се подготвени околу 100 маски кои низ селото ќе продефилираат на 14. јануари за време на празникот Василица. Делчо Гошев, еден од кумовите на „Ѕвегорска Сурова” вели дека ова е традиција која датира од пред 100 и повеќе години.

Рударскиот град Пробиштип ќе добие Музеј на ретки минерали, неговата реализација ќе почне годинава, најави градоначалникот на Општина Пробиштип, Драган Анастасов.

Подрачната единица на Дирекцијата за заштита и спасување од Крива Паланка ги сподели препораките за граѓаните од повисоките предели и сите граѓани кои се движат во планина во зимски услови,со кои ќе се превенираат несакани последици и ќе се заштитат граѓаните.

Семејството од куќата која изгоре утринава во Кавадарци е сместено кај роднини, најавена е помош и од општината и од компанијата „Кожувчанка".

Педесеттина подржувачи на иницијативата „Да ја спасиме Попова Шапка“ дваесетина минути го блокираа патот што води кон истоимениот зимски центар кај жичарницата во Тетово. На овој начин тие го искажаа своето незадоволство од, како што рекоа, несовесноста, неодржливоста, заборавените инвестиции и уништувањето на едно од најпознатите рекреативни места од поранешна Југославија од самите локални и државни структури.

Општина Кавадарци ќе помогне на семејството чиј дом утрово беше зафатен од пожар, велат за МИА од кабинетот на кавадаречкиот градоначалник Митко Јанчев. Оттаму појаснуваат дека по проценките на штетата, одлука за висината на помошта ќе донесе Советот на општината.

Како резултат на актуелната состојба со појавата на морбили во детските градинки во државата, Јавната општинска установа детска градинка „Бамби“ од Македонска Каменица донесе указ со што се забранува прием на децата кои не се вакцинирани од морбили, рубеола и паротит (МРП), пренесува МИА.

Општина Куманово ги повика даночните обврзници да поднесат пријава за утврдување данок на имот за 2019 година и пријава за утврдување комунална такса за фирма на деловна просторија.

Во просториите на Здружението на слепи и слабовидни лица во Кичево, заменикот директор на ЕЛЕМ Фатмир Лимани врачи донација од шест илјади евра во денарска противвредност до претседателот на здружението во Кичево Зендел Зулбеари.