Сменети се паноата во Спомен куќата на народниот херој Страшо Пинџур во кавадаречкото село Ваташа, 42 години од отворањето на објектот за посетители. Директорката на кавадаречкиот музеј, Весна Ѓорѓиева информира за МИА дека станува збор за проект од национален интерес за реновирање и дополнување на историската поставка, поддржан од Министерството за култура.

Женско е првото новороденче во 2019 година на акушерското одделение во Општата болница со проширена дејност од Кочани. На свет го донесе мајката Елсида Шакирова од Кочани, за која тоа е трета рожба.

Првиот пазарен ден во Новата година, денеска во Гевгелија половично го испразни зелениот пазар, како што велат присутните продавачи, веројатно поради примената на новата законска регулатива која од 1 јануари дозволува продажба само на прехранбени производи на зелените пазари.

Црвениот Крст на Струмица заедно со Меѓуопштинскиот Центар за социјални работи се подготвени за прием на бездомници и нивно згрижување во двата контејнери, кои се поставени во дворот на седиштето на организацијата.

Времето е облачно со повремени врнежи од снег. Повеќе врнежи ќе има во западните и јужните делови. Денеска и утре ќе дува умерен, повремено засилен северен ветер што на места ќе достигнува брзина над 70 километри на час.

Пожарникарите од Кавадарци бо 2018 година интервенирале 273 пати, а нивните колеги од Неготино имале 90 интервенции. Апелираат за зголемување на противпожарната свест кај населението од четирите општини од Тиквешијата. Да делуваат превентивно, со цел да се спречат пожарите.

Екипите на јавното претпријатие „Комунално“ ноќеска и денеска го расчистуваат снегот од кејот, улиците и тротоеарите во Струга.

Градоначалникот на општина Маврово и Ростуше, Медат Куртовски и претставник од градежното претпријатие „Илинден“ АД Струга потпишаа договор за реконструкција, асфалтирање и уредување на локалниот пат кој поминува низ селото Велебрдо, едно од најголемите села во подрачјето на Река.

Општина Карпош ги известува сите граѓани дека градинките на територија на Општината („Мајски цвет“, „Пролет“, „Распеана младост“ и „Орце Николов“) ќе ги примаат само децата чии родители/старатели ќе приложат здравствена потврда за примена МРП вакцина.

По прогласувањето на епидемија од морбили (мали сипаници) на целото подрачје на град Скопје од страна на Министерството за труд и социјална политика, Општина Кисела Вода известува дека од денес, стапува во сила привремена мерка забрана за носење на сите невакцинирани деца од МРП-вакцината (за морбили, рубеола и паротитис) во сите градинки на подрачјето на градот.