Конфедерацијата на слободни синдикати (КСС) за утре најавува протест во Прилеп барајќи зголемување на платите во јавниот сектор, усогласеност со минималната плата и исплата на К-15 во јавниот сектор. КСС бара и работа без притисок и мобинг, почитување на законите и колективните договори и почитување на социјалниот дијалог.

Зголемено ниво на реките во однос на просекот за декември се бележи денеска на Вардар кај Демир Капија, на Пчиња кај Катлановска Бања, на Крива Река кај Крива Паланка, на Брегалница кај Штип, на Црна Река кај Новаци, на Црни Дрим кај Ложани, на Треска кај Македонски Брод и на Сатеска кај Ботун.

Во организација на земјоделско-сточарското здружение „Агро центар” од Велес, денеска во село Теово, општина Чашка, ќе се одржи 9. средба на сточарите, како и на претставници од локални земјоделски здруженија во Македонија.

Саем за кариера ќе се одржи денеска во Битола на кој компаниите ќе пондат над 100 слободни работни места.

Регулаторната комисија за енергетика и водни услуги денеска ќе одржи подготвителна седница за носење одлуки за издавање привремени лиценци за вршење енергетска дејност производство на електрична енергија од фотонапонска електроцентрала.

Во организација на подрачната единица на АПРЗ и земјоделско-сточарско здружение „АГРО ЦЕНТАР“ од Велес, денеска во с. Теово, општина Чашка, ќе се одржи деветта средба на сточари (одгледувачи на овци) и земјоделци од Републиката.

Заштитната цена на такси во Куманово се зголемува од 50 на 60 денари, одлучија советниците на денешната седница.

Сообраќајот на патиштата се одвива без забрани, по претежно влажни коловози. Слаб снег, што не се задржува на коловозот, провејува во Битола, Ресен, Кичево, Македонски Брод, Попова Шапка, Маврово и на планинските превои Стража, Буково, Ѓавато и Пресека.

Проектот „Реконструкција и адаптација на влезот и салата од Советот на општина Охрид“ беше избран за приоритетен проект на последната, четврта по ред сесија од Форумот на заедници што денеска се одржа во Охрид. Проектот вреден 50 илјади швајцарски франци ќе се реализира со целосна финансиска поддршка на УНДП и Амбасадата на Швајцарија во Македонија.

Пред крајот на буџетската година општина Струмица продолжува со интензивно подобрување на уличната инфраструктура. Во изминатиот период се работеше на асфалтирање на повеќе улици. Градоначалникот на Струмица Коста Јаневски денеска беше на улицата „11 септември“, каде се поставува нов слој асфалт.