Заев и Тевдовски на средба со Лабуристите во Лондон

Во рамки на посетата во Лондон, премиерот Зоран Заев заедно со министер за финансии Драган Тевдовски се сретнаа со лидерот на Лабуристите, Џереми Корбин и потпретседателката Емили Торнбери, од најголемата Социјалдемократска партија во Европа.

На средбата на Социјалдемократите од Македонија и Велика Британија беа афирмирани заедничките заложби за создавање едно општество за сите - инклузивно општество базирано врз принципите на социјална правда со фер даноци и поддршка за ранливите групи.

Претседателот Заев ги информираше колегите од Велика Британија за демократските реформи што се спроведуваат во Македонија, имплементацијата на економските и социјалните мерки, како и напорите што ги прави оваа влада за интеграција во ЕУ и НАТО.

Лидерите на Лабуристичката партија Корбин и Торнбери изразија поддршка за активностите на владата предводена од премиерот Заев, кои ја вратија стабилноста во Македонија и ги подобрија односите со соседите. Тие оценија дека за една година нашата земја се променила во позитивна насока и ја заслужува посакуваната евро-атлантска иднина.