Арсовски: Комшии и печалбари како Ивица Конески се неславен багаж на ВМРО-ДПМНЕ кои партијата ја гледаат како ДООЕЛ

Димче Арсовски, Портпаролот на ВМРО-ДПМНЕ преку фејсбук статус му порача на поранешниот градоначалник на Аеродром Ивица Коневски дека времето на печалбари во партијата е завршено, откако тој јавно побара одговорност од Претседателот на опозицијата, надоврзувајќи се на осумте исклучени пратеници кои гласаа за промена на името, Митко Јанчев, Сашо Мијалков и Никола Попоски.

- Добро е што Ивица Коневски излезе со став, инаку сликата на печалбар од ВМРО-ДПМНЕ не би била потполна.Очигледно адвокатурата му иде толку лошо, што сега има желба да менува професија и да се враќа во политика, каде што пак последните години од кариера му идеше уште полошо од адвокатурата сега. Работава испаѓа – Не умри магаре до зелена трева. И не треба никој да се труди да пишува имиња и презимиња околу печалбарите, сами ќе се јават сите.Е сега малку околу суштината, овие луѓе кои бараат смена на Претседателот Христијан Мицкоски се всушност неславниот багаж кој ВМРО-ДПМНЕ го влечеше како тег во пропаст, а потајно се молеа и работеа да победи СДСМ и на референдумот и на изборите, напиша Арсовски.

Сметам јас, а и целото членство, дека е време тој багаж да се истовари, затоа што ВМРО-ДПМНЕ е многу повеќе од тие ликови кои кога велат промени, мислат на тоа – тие да ја управуваат партијата која и тогаш и сега ја гледаат како ДООЕЛ за пари и бизнис. А, слушам веќе и функции си поделиле, па Ивица ќе бил секретар. Добра е таа ментална гимнастика на илузијата за која треба да знаат дека домашниот есап и тој на пазар никогаш не излегува. Знаете зошто? Затоа што ВМРО е на народот, на членовите кои се со нејзе и при сите подеми и при сите падови. А, сите оние кои ги полнат провладините медиуми со усти полни со омраза кон ВМРО, а во исто време повикуваат на единство во време кога ВМРО-ДПМНЕ се труди да состави Влада, всушност имаат за задача да му помогнат на Заев, напиша Арсовски.

Па, нели е чудно што Ивица Коневски, а и сите други зад кои се провлекуваат афери, скандали и сомнежи немаат проблем со законот и ниту една пријава? Нели е чудно што човекот што го викаат “комшијата” во Аеродром го нема 3 години да каже збор против Зоран Заев и Златко Марин, а денес тера филозофски расправи за ВМРО-ДПМНЕ?, праша Арсовски.

Тежината на Ивица Коневски се виде на изборите во 2017, односно “тежи” минус 4.000 гласови. Среќа не работеше во кампања сега, па работите дојдоа на свое место и општина Аеродром со сите населби повторно е победничка и бастион. За на крај, сите овие луѓе кои се дел од багажот на ВМРО-ДПМНЕ, Мицкоски ќе го остави зад себе. Од тој момент потоа, тој му припаѓа на Заев.

ПС Заев, со среќа да си го носиш багажот, напиша Димче Арсовски портпарол на ВМРО-ДПМНЕ