Георгиевски кој пред 16 години сам се откажа од титулата „почесен претседател“ сега истата ќе си ја бара на суд

Оние кои константно ја следат македонската политичка сцена, паметат дека поранешниот Претседател на ВМРО-ДПМНЕ Љубчо Георгиевски, откако го напушти кормилото на партијата се откажа и од титулата која тогашниот лидер Никола Груевски му ја додели, односно се откажа од тоа да биде почесен Претседател на ВМРО-ДПМНЕ.

За таа негова одлука тогаш, во 2004 година, известија и медиумите а во продолжение интегрален текст од информацијата објавена на А1 Телевизија.

„Почесниот претседател на ВМРО ДПМНЕ, Љубчо Георгиевски денеска се откажа од својата почесна титула обвинувајќи го актуелниот лидер Никола Груевски дека откако е избран за претседател повеќе време потрошил на кадровските чистки во партијата, отколку на битката против нивниот вечен ривал СДСМ“.

„Жално е сознанието дека Никола Груевски речиси цела година посветил на подготовките за политичка пресметка со Љубчо Георгиевски, а не со Бранко Црвенковски”, пишува во тогашното писмено обраќање на Георгиевски во кое тој додава дека неговата одлука е конечна и неотповиклива. Повлекувањето на почесниот претседател следи два дена по седницата на централниот комитет на која Груевски ја докажа својата превласт и му зададе сериозен удар на Георгиевски и неговите следбеници.

Седницата била показател, вели Георгиевски, дека во наредниот период ќе се интензивирала политичката егзекуција на нему лојалните кадри.

„Искрено се надевам дека од денеска натаму, Никола Груевски ќе може спокојно да им докажува на комунистичките новинари и на одредени дипломати, дека не е никаков инструмент во рацете на Љубчо Георгиевски, туку самостоен и самомислечки политичар,” вели Георгиевски.

А1 дознава дека синоќа лидерот Груевски одржал средба со Георгиевски на која се обидел да го премисли почесниот претседател да не се повлекува и да и помогне на партијата во наредниот период, посебно на престојните локални избори. Очигледно средбата завршила неуспешно. Од таборот на Георгиевски велат дека неговото повлекување не значи и крај на кризата во ВМРО ДПМНЕ. Според нив, се уште е нејасно како ќе реагира членството во внатрешноста кое се уште му е лојално на поранешниот лидер. Најави за превирања на пониско ниво најавија и приврзаниците на Георгиевски во извршниот комитет кој поднесоа оставки по завчерашниот пораз. Тие по седницата рекоа дека централниот комитет не ја претставувал волјата на членството, информираше Телевизијата А1 во 2004 година, односно пред цели 16 години.

Денеска пак, откако ВМРО-ДПМНЕ пред неколку денови направи статутарни измени, целосно го демократизираше процесот на избор на партиски функционери, го ограничи мандатот на лидерот на партијата и ги укина одередбите за почесен претседател и почесни членови, Љубчо Георгиевски се појави во јавноста со информација дека на суд ќе бара да не му биде одземена титулата почесен претседател.

- Правната држава започнува со почитувањето на сопствениот статут. Не може нешто што е одлучено на Конгрес да се промени на Централен комитет, напиша Георгиевски во неговиот фејсбук статус.

Како планира да го направи истото, во случај кога сам се откажа од истата или пак ова е само обид на власта преку него да го минимизира ефектот од укинувањето на овие позиции и на тој начин дистанцирање од претходните претседатели на партијата, останува да се види во иднина.