Груевски: Политичкиот прогон и хајките против мене се дефокус на јавноста од преговорите за Гоце Делчев и криминалот на власта

Откако денеска беше приведен и му беше одреден 30 дневен притвор на Ристо Новачевски, кум на поранешниот премиер Никола Груевски и откако Јавното обвинителство објави дека покренува истражна постапка против Новачевски, Груевски и други четири лица за плацовите на Водно и злоупотреба на финансиски средства, со своја реакција на социјалните мрежи излезе и Груевски.

- Власта продолжува со политичкиот прогон и хајките против мене и против други луѓе кои ги прогонуваат за да изнудат било какви невистинити изјави против мене.

Денешната истрага има иста цел како и сите претходни и е без никаква основа затоа што тврдењата се лага очигледно смислена и конструирана со цел за моја дискредитација, понатамошен прогон, дефокус на јавноста од нивното катастрофално работење, тргувањето со националниот интерес, бројните и секојдневни проневери, криминал и рекет кој го прави власта.

Се што стои во објавата со која отвориле истрага е лага и неточно и еден ден се ќе им падне. Ќе останат само траумите кои ги направиле кон сите кои ги прогонуваат и сеќавањето за времето кога Македонија е држава со најголем број политички прогонувани лица во Европа заедно со лицата прогонувани со намера да се принудат да бидат средство и алатка на власта во прогонот кон политичките неистомисленици, реагира Груевски.