Калифорнија од април ги отвора стадионите за навивачи

Гувернерот на американската сојузна држава Калифорнија, Гевин Њусом најави можност за враќање на публиката на стадионите во професионалната безбол лига (МЛБ) кога во април ќе стартува новата сезона.

-Работиме на завршните детали. Тесно соработуваме со раководството на МЛБ и останатите од целиот сектор, изјави првиот човек на Калифорнија.

Стадионите во оваа американска држава во текот на целата 2020 година беа затворени поради пандемијата на коронавирус, а Њусом и локалните здравствени власти долго говореа дека масовните собири, како што се спортските настани, ќе бидат меѓу последните што ќе се вратат во нормала.

Сега тоа би можело да се промени, а ваквите најави ги поздравија и фудбалските екипи ЛА Галакси и Лос Анџелес, спроти стартот на новата фудбалска сезона во МЛС на 17 април.

-Се надеваме дека ќе можеме делумно да го отвориме нашиот стадион, изјави портпаролката на Галакси, Вики Меркадо за весникот „Лос Анџелес Тајмс“.