Самуеле Ричи нов играч на Милан

Милан успеа да постигне договор со Торино во врска со трансферот на играчот од средниот ред Самуеле Ричи, објави Фабрицио Романо.

Трансферната сума изнесува 23+2 милиони евра, а лекарските прегледи на играчот ќе се одржат на почетокот на следната недела. Така, Ричи ќе стане првото ново засилување на Милан ова лето.

Клубот веќе потпиша со слободниот агент Лука Модриќ на почетокот на месецот, но тој ќе го комплетира својот трансфер дури по завршувањето на Светското клупско првенство, на кое учествува со Реал Мадрид.

Од друга страна, се очекува договорот на италијанскиот интернационалец да биде до летото 2030 година со плата од 2,5 милиони евра по сезона.

Ричи (23) пристигна во Торино во 2022 година со трансфер од неговиот роден град Емполи вреден 8,5 милиони евра. Оттогаш, дефанзивниот играч за врска одигра вкупно 113 натпревари со 4 гола и 7 асистенции за „биковите“, а досега има запишано 10 натпревари со репрезентацијата.