Мицкоски на иста позиција со Бајден и Макрон во однос на случувањата во Израел

Фејсбук статусот на лидерот на ВМРО-ДПМНЕ Христијан Мицкоски за случувањата на блискиот исток, појасот Газа и Израел наиде на осуда и остри реакции од неистомислениците и приврзаниците на двете страни.

Од друга страна пак, и официјалниот став на САД не се разликува од изнесениот статус на Мицкоски.

– Израел има право да се брани кога на негова територија стигнуваат илјадници ракети, изјави Бајден по телефонскиот разговор со израелскиот премиер Бенјамин Нетанјаху.

Покрај ставот на Бајден, статусот на Мицкоски е во линија и со ставот на францускиот претседател Емануел Макрон кој во разговор со израелскиот премиер Бенјамин Нетанјаху оцени дека „Израел има право да се брани“, пренесуваат светските медиуми.

Како што беше објавено од Елисејската палата, Макрон изразил загриженост и за страдањата на цивилите во појасот Газа, пренесува Ројтерс.

Со ова, Макрон го повтори истиот став како и американскиот претседател, Џо Бајден, кој синоќа изјави дека Израел има право на самоодбрана.

Од ВМРО-ДПМНЕ посочуваат дека објавата на Мицкоски не се однесува кон палестинскиот народ, ниту пак кон муслиманите, или пак арапскиот народ, туку се однесува кон правото на држава пријател на Македонија да ја заштити својата територија кога истата е нападната и гранатирана од паравоена формација.

– Денес во Израел губат животи за жал подеднакво и муслимани, и евреи и христијани. Водедно и оваа прилика апелираме на прекин на огнот, наоѓање на заедничко решение и смирување на тензиите и насилствата, велат од ВМРО-ДПМНЕ.

Во исто време, МВР повторно потфрли. И покрај, во најмала рака, говорот на омраза, поради ставот на Мицкоски, нема никаква реакција од надлежното Министерство.

За потсетување, судирите ескалираа на денот кога Евреите го слават обединувањето на Ерусалим после војната од 1967 година.

Хамас лансираше ракети врз Ерусалим и Тел Авив, а израелската војска го бомбардираше Појасот Газа. Израелските ракетни напади врз Газа досега оставија најмалку 67 жртви, од кои 17 деца. Околу 400 се повредени. Милитантите од Газа лансираа повеќе од 1.000 ракети кон Израел од почетокот на нападите во понеделникот попладне, при што беа повредени над 200 израелски цивили и убиени седум жртви.