Привршува изградбата на игралиштето кај СК „Соколана“ Куманово

Привршува изградбата на спортското игралиште кај спортскиот комплекс „Соколана“ во Куманово, информираа денеска надлежните од општината. Средствата за реконструкцијата се обезбедени преку Агенцијата за млади и спорт. Игралиштето е реконструирано, уредени се трибините, завршено е партерното уредување, поставена е нова современа подглога за спортски активности.

– Го враќаме сјајот на спортскиот комплекс „Соколана“, а со тоа ги враќаме и спомените на спортските легенди од нашиот град, спомените на сите генерации кои поминале значаен дел од своето детство и својата младост во овој „храм на спортот“ во Куманово. Многу заеднички спомени, им должиме на овие генерации за нивниот придонес на сите полиња за нас и државата. Благодарност до Агенција за млади и спорт, напиша на својот Фејсбук профил кумановскиот градоначалник, Максим Димитриевски.

Ова е една од првите фази за инвестиции наменети за овој комплекс, кој е еден од четирте големи спортски објекти кои државата ѝ ги врати во владение на општината. Претходно со нив стопанисуваа приватни субјекти. Покрај Соколана, на општината ѝ се вратени градскиот стадион, стрелиштето и спортската сала.