Во гевгелискиот манастир се одржа света божествена литургија по повод Спасовден

По повод одбележувањето на Христовото Вознесение, Спасовден, заштитникот на градот Гевгелија, денеска во манастирската црква „Свети Спас“ се одржа свечена божествена литургија на која покрај многуте верници, присуствуваше и градоначалникот Сашо Поцков.

Со свечената богослужба чиноначалствуваше неговото високо преосвештенство, митрополитот повардарски господин Агатангел во сослужение Иларион и Пимен.

Со честитката за празникот што ја упати кон многубројните верници, господин Агатангел истакна дека токму сега е времето кога треба духовен мир да ги исполни душите и срцата на сите присутни, нивните семејства и на целиот македонски народ.

-Не треба да не разделува ниту верската, ниту националната, ниту политичката разноликост. Потребно е световно и духовно единство, потребна е меѓусебна љубов и почит за да можеме да си го зачуваме идентитетот, нашиот јазикот и сите наши културни и општествени вредности, рече господин Агатангел.