Два златни медала за бенчерот Стаменковски на Европскиот шампионат во Одеса

Каменичкиот спортист Бошко Стаменковски, кој во изминатите неколку години успешно ја претставува државата во меѓународни рамки во „Пауер лифтинг”, со нов голем успех се враќа од Европскиот шампионат во Бенч-прес, кој викендов се одржа во Одеса, Украина.

Стаменковски на ова натпреварување освои два златни медала, а воедно беше прогласен и за најдобар бенчер, што според него е голем успех со оглед на конкуренцијата на турнирот.

-Европскиот шампионат во Одеса го завршив со освоено прво место во Бенч и освоено прво место во Бенч со повторување со 60 килограми со вкупно 94 повторувања за 5 минути. Поради ова бев прогласен и за релативно најдобар бенчер на првенството, истакна Стаменковски.

Додаде дека следниот период ќе го искористи за настап на вакви и слични турнири во повеќе европски држави.

Големите успеси што ги постигна каменичкиот спортист беа забележани од Македонскиот олимписки комитет со кој годинава има потпишано договор за соработка и финансиска поддршка.