МВР: Казнети 209 возачи за брзо возење

Во рамки на акциска контрола што полицијата вчера ја спроведе на територијата на Република Македонија за санкционирање возачи кои се движат со брзина поголема од дозволената, санкционирани се 209 возачи. Како што соопшти денеска МВР, од нив пет возачи управувале со возилата со брзина над 50 километри на час повеќе од дозволеното. Притоа 121 возач ја пречекорил брзината во населено место, а 88 надвор од населено место. Од МВР најавуваат дека сообраќајните контроли продолжуваат и во наредните денови. Апелираат до сите учесници во сообраќајот да ги почитуваат сообраќајните правила и прописи за заеднички придонес за побезбедни патишта.