Високи гости од дипломатскиот кор во посета во Бигорскиот манастир

Во посета на Бигорската свештена oбител денеска беа амбасадорите на пет пријателски држави, на Албанија Денион Меидани, на Италија Паоло Палминтери, на Унгарија Андраш Клеин, на Чешката Република Јарослав Лудва и амбасадорот на Кралството Шпанија Рафаел Соријано Ортиз, објави Бигорски манастир.

- Со благослов на нашиот старец и игумен, Неговото Преосвештенство, епископ Антаниски г. Партениј, високо ценетите гости беа пречекани од економот на манастирот, архимандритот Доситеј. Тој им приреди топло добредојде, запознавајќи ги со богатата историја, духовното значење и културното наследство на ова наше илјадалетно светилиште, додаваат од манастирот.

На средбата разговарале за актуелните предизвици и животот во манастирот, како и за неговата улога како духовен центар кој го негува духот на меѓу културното сопостоење.

Амбасадорите ја изразија својата восхитеност од убавината на Обителта, од нејзината повеќестрана мисија, како и од гостопримството на монашкото братство.

- Оваа средба беше уште еден показател за континуираниот интерес и почитта што меѓународната дипломатска заедница ја има кон Бигорскиот Манастир како едно од најзначајните духовни и културни средишта во регионот, оценуваат од манастирот.

Странските дипломати денеска беа во посета и на општина Дебар, при што по средбата со градоначалникот Хекуран Дука и неговите соработници, го посетија градскиот етно музеј.