Одбележана годишнината од загинувањето на Гоце Делчев во Струмица

Со полагање цвеќе пред споменикот на Гоце Делчев во Струмица беше одбележана 122 годишнината од загинувањето на апостолот на македонското револуционерно движење.

За животот и делото на Делчев говореше градоначалникот на Струмица, Костадин Костадинов.

- И ако денес некој ве праша: „Која земја му е дом на Делчев“, одговорете му: „Тоа е земјата за која се борел. Тоа е земјата за која загинал. Тоа е земјата во која се наоѓа неговото вечно почивалиште. Тоа е Македонија. Но, Гоце нема да го најдете само во црквата „Свети Спас“ во Скопје. Него ќе го најдете и во секое срце македонско, во секоја душа македонска, на секоја педа македонска земја“, рече Костадинов.

Цвеќе пред споменикот положија членови на Советот, претставници на политички партии, пратеници и здруженија од општината, а стихови инспирирани од делото на Делчев рецитираа членови на рецитаторската секција при Домот за деца и млади „Благој Јанков Мучето“.