До 15 часот во Кавадарци излезеноста на денешниот референдум е 20,9 отсто.

Претседателот на Здржението „Цивил - Центар на слобода“ Џабир Дерала, на третата прес-конференција, по повод референдумското изјаснување, изјави дека од досегашните 113 извештаи добиени од набљудувачите на терен забележани се голем број нерегуларности, од кои повеќето се предизвикани од изборната администрација.

ОИК Битола информира дека до 15 часот на 170 гласачки места гласале 23,5 отсто од гласачите.

Последните четири часа одѕивот на референдумот во Кичево е три пати зголемен, велат од Општинската изборна комисија (ОИК).

Мирно и демократски се одвива гласањето во општините Новаци и Могила, информираат тамошните изборни комисии.

До 15 часот во Демир Капија одѕивот на гласање на референдумот е 23,51 отсто.

Во Делчево референдумското гласање тече без нарушувања. Во 15 часот согласно новодобиените информации од општинската изборна комисија 3.451 гласач го остварил своето референдумско право.

Потпретседателот на ВМРО-ДПМНЕ Владо Мисајловски потврди дека нема да гласа на референдумот и вели дека манипулативно поставеното референдумско прасање придонесува апстиненцијата да е негов избор.

Од МВР информираат дека се пријавени неколку нови но незначајни инциденти за време на референдумскиот процес.

До овој момент нема некои посериозни нарушувања на гласањето на референдумот, освен инцидентот што се случи во дворот на ОУ „Лазо Ангеловски” во Скопје, кога едно лице нападна тројца полициски службеници за време на гласањето, изјави јавниот обвинител Џељаљ Бајрами, кој е претседател на Комисијата за следење евентуални противправности на референдумот.