Министрите за надворешни работи на Грција, Бугарија, Романија и Хрватска, до крајот на годинава планираат да ги посетат Македонија и Албанија. Ова, според шефот на грчката дипломатија, било договорено на квадрилатералната средба во Њујорк на која учествуваа шефовите на дипломатиите на четирите земји од регионот, членки во ЕУ.

Косовскиот пратеник и новинар Миљаим Зека, кој беше уапсен вчера заради јавни закани изречени кон обвинител од Специјалното обвинителство на Косово, им изјави на претставници на Советот за заштита на човековите права и слободи (КМДЛЊ), кои го посетија во притвор, дека не бил малтретиран од полицијата, а апсењето го смета за политичко.

Во рамки на стратегијата за зголемување на наталитетот, албанската Влада од 1 јануари 2019 година ќе доделува еднократен паричен надомест, во различен износ, за секое новороденче.

Грчката агенција за независни приходи, пресметала дека грчката влада од неплатените даноци на домаќинства и компании може да собере 182,5 милијарди евра, а тоа е половина од јавниот долг на Грција. Агенцијата ги достави тие информации до Парламентот.

Градоначалникот на Подгорица Иван Вуковиќ најави дека ќе ја поддржи иницијативата за иградба на споменик на Јосип Броз Тито во главниот град на Црна Гора, чие име (Титоград) градот го носеше 47 години.

Грчките власти повлекле од пазарите за овошје и зеленчук во Атина 4,6 тони домати увезени од Албанија и од Италија,поради големо присуство на опасни пестициди.

Албанскиот претседател Илир Мета присуствуваше на приемот организиран од претседателот на САД, Доналд Трамп.

Две третини од Србите имаат негативен став кон Албанците како и две третини Албанци спрема Србите, иако само петтина Срби лично познаваат Албанец и само шест отсто Албанци имаат познаник меѓу Србите, покажуваат резултатите од анкетата на Фактор плус.

Косовскиот претседател Хашим Тачи, кој ја предводи делегацијата на неговата земја на Генералното заседание на ОН во Њујорк, изјави дека од претставници на САД, со кои се сретнал, добил уверување дека Вашингтон го поддржува дијалогот што го води со неговиот српски колега Александар Вучиќ и ќе го почитува тоа што Приштина и Белград ќе го договорат, јави дописникот на МИА од Приштина.

Косовскиот министер за надворешни работи Беџет пацоли изјави дека меѓу Србија и Косово не би требало ни да постои граница и оти „топката треба да се префрли на економско поле“.