Силва во Сити за 68 милиони евра

Фудбалерот од средината на теренот на Монако, Бернардо Силва, потпишал договор со Манчестер сити, потврдија „граѓаните“.

Дваесет и двегодишниот Португалец ќе го носи дресот со број 20, а на располагање на менаџерот Пеп Гвардиола ќе биде од 1-ви јули.

„Кога се укажува можност да играте под водство на Гвардиола не можете да кажете не. Сите знаат каква работа заврши во Барселона и во Баерн. Тоа е неверојатно. Очекувам дека и со Сити ќе освојува титули“, изјави Силва. Финансиските детали за трансферот не се соопштени, а англиските медиуми пренесоа дека Сити за Силва платил 68 милиони евра.

Португалецот во јануари 2015 година од Бенфика отиде во Монако за 15 милиони евра и сезонава со тимот од Кнежеството ја освои шампионската титула и дојде до полуфиналете во Лигата на шампионите.