Граѓанските организации од Струмица со поддршка за референдумот

Граѓанските организации од Струмица вечерва се приклучија кон коалицијата „Заедно за европска Македонија“.

На заедничкиот состанок со градоначалникот на општина Струмица Коста Јаневски, тие ја искажаа нивната подготвеност да излезат и да гласаат на референдумот на 30 септември, како и да ги повикаат граѓаните да го направат истото.

Јаневски истакна дека Струмица има одлично искуство и е на врвот меѓу општините во искористувањето средства од европските фондови во изминатиот период.

- Реализирани се повеќе проекти и во оваа прилика ќе спомнам дел од нив: изградба на Пречистителната станица за отпадни води во нашиот град, кој разреши еден долгогодишен горлив проблем за граѓаните од нашата општина, проектот за изградба на пристапен пат, реконструкција и археолошки испитувања на локалитетот Цареви кули, новото крило во СОУ „Јане Сандански“, реконструкција на ООУ „Никола Вапцаров“, ООУ „Кирил и Методиј“ во Дабиле и Детската градинка - Клон 2, Фотоволтажни системи во ООУ „Сандо Масев“ и во две градинки, туристичката трим патека во Банско и уште многу други, истакна Јаневски на средбата со граѓанските оранизации.

Заедно со граѓанските организации ги покани граѓаните на 30 септември да гласаат за европска Македонија и да дадат поддршка на интегративните процеси на Македонија во НАТО и ЕУ, поддржувајќи го Договорот со Грција.