Милошоски: Не може амбасадор со двојно државјанство, ВМРО-ДПМНЕ ќе го блокира Законот за надворешни работи

Пратеникот од редовите на ВМРО-ДПМНЕ, Антонио Милошоски, најави дека опозицијата во парламентот ќе поднесе најмалку 300 амандмани на Законот за надворешни работи со кој се предвидува амбасадор на Република Македонија да може да има двојно државјанство.

- Заедно со колеги пратеници ќе го блокираме предлог Законот за надворешни работи, каде за амбасадор се дозволува да има и друго државјанство, освен македонско. Тоа е погрешно решение и ќе поднесеме 300 амандмани.

Прво, затоа што измената е произволна и претставува обид законот да се прилагоди на неколку персонални решенија на владините партнери за пополнување на амбасадорски позиции.

Второ, овие измени се спротивни на Законот за класифицирани информации според кој неопходен предуслов за кандидатот за амбасадор да добие “безбедносен сертификат со степен Државна тајна" е да не е државјанин и на друга држава, а амбасадор без безбедносен сертификат не е амбасадор.

Трето, затоа што дипломатијата, како и безбедноста, е сензитивна професија каде лојалноста кон матичната држава Македонија не смее да биде доведена под знак прашалник, истакна Милошоски.