Соопштение на СДСМ пред точно 5 години: Криминалот на фамилијата ја смести Македонија на 66-то место според корупција

Резултатите на ВМРО-ДПМНЕ се корупција и загрозена демократија, се наведува во соопштението за јавност испратено од владеачката партија на 27 јануари 2016 година, тогаш опозиција.

- Два извештаи на релевантни меѓународни организации потврдуваат дека ВМРО-ДПМНЕ и Никола Груевски ја парализираа државата во последните 10 години за свое лично богатење. Корупцијата расте, демократијата е загрозена.

Според извештајот на Фридом Хаус, Македонија го изгуби својот статус како изборна демократија и е во исти кош со Хондурас и Малдиви.

Македонија според Фридом Хаус е делумно слободна држава и бележи надолен тренд во слободите. Констатирани се недостатоците за време на гласањето како и изборните измами.

Македонија го зазема последното место во регионот според политичките слободи што е катастрофално лош показател за било која нормална држава.

Граѓаните најсилно ги чувствуваат последиците од владеењето на Никола Груевски и ВМРО-ДПМНЕ. Вистината за Македонија го покажа целокупниот криминал на фамилијата но и изборните измами, манипулациите со лажните лични карти, притисоците врз граѓаните, уцените.

Тоа го потврди и извештајот на реномираната организација Фридом хаус.

Вториот меѓународен извештај објавен денес, на Транспаренси интернејшнал, потврдува дека корупцијата е сериозен проблем во Република Македонија.

Криминалот на фамилијата во изминатите 10 години ја смести земјата во групата на земји коишто имаат сериозен проблем со корупцијата. Македонија го дели 66 место, со Сао Томе и Принципе.

Ова е силна потврда дека на Македонија и се неопходни промени, неопходно и е враќањето на слободата и демократијата.

Македонија бара промени и промените ќе се случат на следните слободни, фер, и демократски избори, стоеше во тогашното соопштение на СДСМ.

Од денешна перспектива гледано, по три и пол години власт на тогашната опозиција која велеше дека нашата земја има сериозен проблем со корупцијата поради криминалната фамилија на власт предводена од Никола Груевски, Македонија, според последниот Извештај на Транспаренси Интернешнл, истиот на кој тогаш се повикуваше СДСМ, се наоѓа на 111-то место и во последните 4 години бележи пад од 45 места.