Поради појава на магла, видливоста на патниот правец Тетово – Гостивар е намалена на 50 – 100 метри, а на планинскиот премин Стража од 20 – 50 метри, информира Автомотосојузот на Македонија.

Забрана за тешки товарни возила е воведена на патниот правец Охрид – Ресен преку планинскиот превој Буково поради интензивни врнежи од снег.

Сообраќајот на државните патишта се одвива по влажни коловози, на некои повисоки места во западните делови од државата со остатоци на кашест снег на коловозот.

Во Штип во трите изминати рока доставени се вкупно 13.106 барања за легализација на дивоградби, од коишто досега се решени 8.362, а во постапка се 4.072 предмета.

Подрачната единица на Заводот за здравствена заштита во Дебар, соопшти дека до денеска регистрирани се 55 случаи на грип.

Волонтерите од кумановската организација на Црвен крст на Македонија денеска поделија хуманитарни пакети на дванаесет семејства од високите плансински села од Козјачијата во Oпштина Старо Нагоричане (Буковљане, Длабочица, Дејловце, Цветишница, Рамно и Арбанашко).

Здружението „Ахмадија“ и невладината организација „Humanity First “, денеска на општина Куманово и донираше специјално возило, кое ќе се користи за превоз на ученици со пречки во развојот. Општината ќе ангажира професионални возачи кои ќе помогнат во превоз на учениците со посебни потреби.

Кавадарци продолжува да ги отстранува старите куќи подложни на паѓање во градот со цел подобрување на безбедноста на граѓаните. Од општината информираат дека се работи на проектот за пробивање на улицата „Кукушка”. Се спроведе уривање на стара куќа подложна на паѓање, како и отстранување и расчистување на просторот.

Во пораст е бројот на долните респираторни инфекции во Делчево. Само во третата недела од јануари годинава во Делчево се регистрирани 94 случаи на вирози од кои во најголем дел од случаите се работи за долни-респираторни инфекции.

Општина Кичево со апел за сите физички и правни лица кои поседуваат имот на територијата на општината, а за што не е извршено оданочување, врз основа на Законот за даноците на имот се задолжуваат да поднесат даночна пријава до крајот на јануари.