Кепевски: Шилегов лаже дека ќе се гради парк на место кое е заштитено бунарско подрачјe

„Шилегов ја лаже јавноста дека ќе се гради парк на место кое е заштитено бунарско подрачје. Ова е доказ дека проектите кој се нудат се од ракав извадени.

На местото каде што Шилегов вчера снимаше спот, каде предвидува изградба на парк и рекреативни содржини се наоѓа бунарското заштитено подрачје Нерези, од кое скопјани во летниот период пијат вода.

Имено согласно Решение донесено од град Скопје уште во 1999 година, бунарското подрачје Нерези-Лепенец е прогласено за заштитена зона.

Местото каде што Шилегов го предвидува паркот се наоѓа во 1 заштитна зона од подрачјето и за него важи чл.7 од решението предвидена е забрана за движење на неовластени лица во подрачјето без посебно одобрение, забрането е садење на дрвја со длабоки корени, ѓубрење на садници и изградба на објекти кои не се во функција на експлоатација на бунарите.

Првата заштитна зона заради вршење на контрола на движење,е физички оградена со заштитна жичана мрежа и обезбедувана со постојана чуварска служба 24/7, како и користење на други технички средства за обезбедување.

Пристап во I зона е дозволен само на лица кои се вработени ЈП „Водовод и канализација“ – Скопје и надлежни инспекциски лица. Пристап на други правни или физички лица е можен само со издадено потребно одобрение од страна на Директорот на претпријатието и за истите треба да се води евиденција која содржи лични податоци, временски период и причини за посетата.

На такво подрачје да предвидиш било што, што не е во функција на бунарите за напојување на вода на Скопје преставува огромна лага.

И најмали градежни активности можат значително да влијаат на квалитетот на водата.

Шилегов свесно ги лаже граѓаните.

Недозволиво и несериозно е да се ветуваат работи кои можат да влијаат штетно на здравјето.

Ова покажува со каква несериозност е правена програмата на СДС без соодветна анализа и студија, се нудат работи кои не се возможни и кои ја загрозуваат животната средина и здравјето на луѓето.

Заради ваквата неодговорност и неспособност граѓаните ќе го казнат СДС на претстојните локални избори на 15-ти октомври“, изјави Томи Кепевски.