Градоначалникот на Кавадарци, командирите на противпожарната и полицијата, началникот на канцеларијата за криминалистички работи, претставници на болницата, судот и обвинителството, претседателот и координаторите на двете најголеми партии во Советот на општината, претставници на стручните служби при локалната самоуправа и воспитно образовни институции, се именувани за членови на новиот Совет за превенција на Кавадарци.

За 10 години или најдоцна до 2030 година Берово и Малешевијата да станат препознатлива македонска воздушна бања, центар за благосостојба, природа и здрава локална храна каде се слават автентичноста и традицијата, е една од целите на проектот за локална и регионална конкурентност во чии рамки денеска се одржа првата работилница на тема „Управување со дестинации”.

Во Велес лани се регистрирани 724 заболени од заразни заболувања, што е за 391 случај помалку споредено со претходната 2017, а кога биле регистрирани 1115 заболени.Со ваквиот годишен биланс не била надмината бројката на предвидените илјада заразни заболувања, а согласно нивната Програма за 2018.

Припадниците на СВР Куманово учествуваа на денешната крводарителска акција што се одржа во простриите на полицијата, а ја организираа Институтот за трансфузиона медицина и Црвениот Крст на Куманово.

Во Струмица денеска се одржа инфо-сесија по објавениот повик „Предизвик за млади истражувачи“ за креирање истражувачки проекти од областа на природните и техничките науки во организација на Фондот за иновации и технолошки развој и Министерството за образование и наука.

Модернизација на истекот на реката Црн Дрим од Охридското Езеро, односно замена на талпите со кои се регулира нивото на водата во езерото со софистицирано електронско поместување на препреките, без негативно влијание врз животната средина и нарушување на автентичноста на дрвениот мост, се дел од предлозите што треба да бидат опфатени во физибилити студијата што ќе ја изработува конзорциум од холандски компании.

Министерството за локална самоуправа со поддршка на Швајцарската агенција за развој и соработка денеска организираше консултативен форум за утврдување на развојните приоритети во Полошкиот плански регион.

По 42-ри пат, од денеска до 24-ти овој месец во Попова Шапка ќе се одржи традиционалната детска манифестација „Снежен град – 2019“, на која ќе учествуваат ученици од основни училишта од Скопје, Куманово, Виница и Тетово.

На регионалниот пат Р1102 делница Велес-Градско утре и задутре сообраќајот ќе се одвива наизменично во двата правца.

Општина Кривогаштани е со блокирана сметка зашто стигнале за наплата побарувања од доверители за досега непријавени долгови од претходната локална власт, се пожали денеска на прес конференција градоначалникот на општината, Рубин Шефтероски.