На прес-конференцијата во 15:30 часот на Државаната изборна комисија, Претседателот на ДИК, Оливер Дерковски изнесе податоци дека до 15:00 часот на гласачките места излегле 334.075 гласачи и дека таа бројка претставува 22,56 отсто од вкупниот број запишани гласачи.

МВР информира дека се регистрирани нови шест нови инциденти за време на референдумското изјаснување по претходно евидентираните 13.

Гласањето на референдумот во Прилеп досега се одвива без застој и непречено, информираат од Општинската изборна комисија. Така е и во општините Крушево, Долнени и во Кривогаштани, велат од општинските комисии.

Во Општина Штип на 77 избирачки места своето правото на глас до 15 часот го искористиле 7.469 лица или 17,84 отсто од вкупниот број избирачи.

До 15 часот во општина Велес излезеноста изнесува 20,02 отсто, односно на референдумско гласање излегле 9.232 гласачи од вкупно 46.110 запишани во единствениот избирачки список, информираат од Општинската изборна комисија во Велес.

Излезеноста на граѓаните за референдумот во Крива Паланка до 15 часот изнесува 30,35 отсто, а гласале вкупно 5.158 граѓани од вкупно регистрираните 16.995 гласачи.

Во општина Гевгелија до 15 чаот гласале 5.224 граѓани од вкупно 19.234 колку што имаат право на глас или 27,16 отсто од гласачкото тело. Сличен е процентот на излезност и во општина Дојран каде до 15 часот гласале 751 лице или 27,6 отсто.

Во Куманово излезеноста на референдумското изјаснување до 15 часот е 22,83 проценти, информираат од Општинската изборна комисија. Право на глас имаат 92.560 гласачи кои гласаат на 167 избирачки места.

Според последните обработени податоци во општина Гостивар правото на глас го искористиле 16.109 лица или приближно 20,3 проценти од вкупниот број во Избирачкиот список.

Според последните информации од ОИК Маврово Ростуше до 15 часот на гласачките места излегле 1.755 што е околу 18,5 проценти од вкупниот број запишани гласачи.