Изборниот процес во Тетовско помина во мирна и демократска атмосфера со мали технички пропусти. Излезеноста, според Артан Адеми, претседател на Општинската изборна комисија, до 17 часот изнесува 33 отсто.

Сите 50 избирачки места во општина Ресен се затворени. До 18:30 часот своето право на глас го искористиле 30,19 отсто од регистрираните во Избирачкиот список, информира претседателот на Општинската изборна комисија Кирил Тански.

Во дебарскиот регион, односно општините Дебар и Центар Жупа референдумското изјаснување мина без никакви проблеми.

Заклучно со последниот пресек направен во 18:30 во Делчево своето право на глас го оствариле 5.031 граѓанин.

Излезноста во Кавадарци на денешниот референдум е 31,3 проценти до 18:30 часот.

Во мирна атмосфера и без неправилности 7.658 граѓани на општина Гевгелија до 18:30 часот го оствариле своето право на референдумско изјаснување или гласале 39,81 отсто од запишаните на Избирачкиот список, изјави Роберта Јанчева, претседател на ОИК Гевгелија.

Во општина Штип до 18 часот и 30 минути своето право на глас го искористиле 13.751 граѓанин.

Потпретседателот на ВМРО-ДПМНЕ и градоначалник на Кавадарци, Митко Јанчев го оствари своето избирачко право на денешниот референдум.

Потпретседателот на Собранието на Република Македонија и лидер на политичката партија Национална демократска преродба (НДП) Весел Мемеди денеска гласаше на референдумот на гласачко место во селото Чајле.

Дописничката на МИА од Атина јавува дека голем дел од грчките медиуми имаат испратено новинари во Скопје кои уште од петокот известуваат за климата во Македонија, за анализите и процените, но и за важноста на денешниот референдум. На грчките телевизии има јавувања во живо од македонската престолнина.